دلجیت دوسانجھ اور ہانیہ عامر: کیا کوئی دھماکا ہونے والا ہے؟

اپنے کامیاب دل لومیناتی ٹور کے بعد بھارتی گلوکار اور اداکار دلجیت دوسانجھ نے پاکستانی اداکارہ ہانیہ عامر کے ساتھ ایک نئے پراجیکٹ کی افواہوں سے انٹرنیٹ پر آگ لگا دی ہے۔

اس کھسر پھسر کا آغاز تب ہوا جب دلجیت نے اپنے انسٹاگرام پر سٹائلش تصویریں شیئر کیں، جس کے بعد جھیل، جنگل اور اونچے درختوں کی خوبصورت تصاویر پوسٹ کیں۔ پھر جھٹ پٹ ہانیہ نے بھی ویسی ہی لوکیشن سے ایک تصویر پوسٹ کر دی، اور اپنے کیپشن میں ٹیلر سوئفٹ کے البم کا حوالہ دیتے ہوئے لکھا: What in the evermore is this۔

ہانیہ نے مزید سسپنس بڑھایا جب انہوں نے اپنی انسٹاگرام سٹوری میں ایک پنجابی گانے پر ڈانس کرتے ہوئے ایک ویڈیو شیئر کی۔ اس کے بعد سے فینز کی تھیوریز کا بازار گرم ہے کہ شاید یہ کسی آنے والے میوزک ویڈیو یا فلم کا حصہ ہے۔ کچھ لوگ تو یہ بھی کہہ رہے ہیں کہ ہانیہ دلجیت کے گانے “Water” میں نظر آ سکتی ہیں، جبکہ دوسروں کا خیال ہے کہ وہ "سردار جی 3" کا حصہ بن سکتی ہیں۔

ویسے یہ کوئی پہلا موقع نہیں جب یہ دونوں ستارے ایک ساتھ نظر آئے ہوں۔ ہانیہ اس سے پہلے بھی دلجیت کے لندن کنسرٹ میں شامل ہوئی تھیں، جہاں دلجیت نے انہیں سٹیج پر بھی بلایا تھا۔ ہانیہ نے اس موقع پر اپنی خوشی کا اظہار بھی کیا تھا۔

اس سب کے باوجود، دلجیت کا شیڈول فی الحال کافی مصروف ہے، ان کی فلم "بارڈر 2" 2026 میں ریلیز ہو رہی ہے، جبکہ "نو انٹری 2" پر کام جاری ہے۔ اس کے علاوہ "سردار جی 3" تو 27 جون 2025 کو سینما گھروں کی زینت بن چکی ہے۔ فینز بے صبری سے اس مبینہ تعاون کی تصدیق کا انتظار کر رہے ہیں۔ تو کیا یہ صرف فینز کی خواہش ہے، یا واقعی کچھ پک رہا ہے؟